Moi, dat du even inkickst. Hier sünd de Websieden för de, de hör egen Padd gahn un doch hier to Huus sünd. Immer unnerwegens, Neeis to entdecken. De Coolen. De Driesten. De Annern. Du hörst daarto!

Waarum wi www.maakt-in-Oostfreesland.de maakt hebben?

Is doch klaar, wi willen wiesen, dat wi daarto stahn, echte Oostfresen to wesen. Wi sünd woll temelk an ’t Enn van de Welt, avers doch midden in ’t Leven. Ok wi hebben uns Drömen, setten neje Trends, boen neje Welten un sünd elke Dag weer neeisgierig. Un wi finnen dat würrelk wichtig, dat nett de Lü hier in d’ Nörden een Saak gemeensam hebben: hör Spraak, Plattdütsk.

Dat word in de noorddütske Küstenkuntreien al siet hunnerten van Jahren as en egen Spraak proot. De hollt Land un Lü tosamen un sitt deep in de Minsken in.Bit ... ja bit ... in de 50er Jahren dat Hoogdütske immer mehr Bedüden kreeg. De plattdütske Spraak kreeg tomaal en slechten Roop. Well noch Platt proten dee, wurr utlacht un weer torüggbleven un en Dörptrampel. Un well wull dat al geern wesen (Hallo Gruppendwang!). Denn kwemen ok noch de Mesters: Wat sull denn blot ut de oostfreeske Kinner worden, wenn de wegen Plattdütsk keen vernünftig Hoogdütsk mehr lehren kunnen?

In Stee, dat Hoogdütsk un Plattdütsk gliek behannelt wurren, wurr dat Plattdütske in de Olldag un de Scholen mehr un mehr bisied schoven. Daarmit fung dat an, dat dat mitd de Spraak, de en wichtigen Deel van uns Region un Kultur is, bargdaal gung. De “moderne Tiedgeist” hett uplesd daarto bidragen, dat vandaag meest blot noch de Ollerden unnernanner Platt proten. Sullen de lesde 50 Jahr dat würrelk klaar brocht hebben, de Spraakkultur, de al so lang besteiht, en Enn to setten?

Vandaag weet man völs beter. Wenn Kinner froh tweesprakig ertrucken worden, verlichtert hör dat later dat Lehren van anner Frömdspraken. Un tweesprakig upwassen is modern un hett Tokummst in Dütskland un Europa. Intüsken setten sük weer völ Lü in uns Region daarför in, dat hör egentlike Moderspraak erhollen blifft. Bands rappen un rocken up Platt. Boken un Websteden sünd in Platt. Jungs un Wichter smieten sük plattdütske Spröken an de Kopp (Downloads ankieken!). För hör all steiht fast: Plattdütsk is hier to Huus. Dat maakt uns to wat Besünners. Dat maakt ut uns en Gemeenskupp. Wenn de plattdütske Spraak neet proot word, kann se neet overleven. Denn geiht se för all Tieden verloren. Un mit hör en wichtigen Deel van uns oostfreeseke Kultur, uns Identität.

Wi glöven fast daaran, dat uns junge Generation Plattdütsk en Chance gifft. Denk daaran:

Du büst maakt in Oostfreesland. Stah daarto. Mit dien Spraak.