Oostfreeske Taal i. V. hett over de Jahren en Bült grote un lüttjerde Projekten stöönt. Swaarpunkten daarbi weren Woordenboken un wetenskuppelke Boken over Plattdüütsk as ok Höör- un Leesgood för Kinner un de „Plattdüütskmaant“.

Dat eerste Woordenbook, dat 1992 mit Stöön van Oostfreeske Taal in de Welt keem, weer dat Oostfreeske Woordenbook van Jürgen Byl un Elke Brückmann. 1993 al folgde de Nadruck van dat Woordenbook van Otto Buurmann in 12 Banden. 2011–2015 bedeligte sük uns Vereen an de Kösten för dat eerste oostfreeske elektronisk Woordenbook, dat unner  www.platt-wb.de in ‘t Nett steiht.

Oostfreeske Taal stöönt dat Rutbrengen van plattdüütske Musik un Literatuur för Kinner un jung Lüü un hett dat Projekt „Plattdüütsk bi d‘ Arbeid“ (1992-1996) tosamen mit dat Plattdüütskbüro van de Oostfreeske Landskupp up d‘ Benen stellt. Daar is de „Plattdüütskmaant“ ut worden, de bit vandaag elke Jahr Stöön van uns Vereen kriggt.

Dat grootste un langste Projekt van Oostfreeske Taal i. V. is de Tiedschrift DIESEL, de siet 1992 elke Jahr mit over 9.000 Euro stöönt word. Vandaag gifft dat tegen dit Literatuurbladd noch en elektronisk Bladdje, dat PlattBladd, dat over Neeis ut de Welt up Platt berichten deit – mit Stöön van Oostfreeske Taal.

 
12345