Nadat Oostfreeske Taal grünnt weer, wurr al bold düdelk, dat de Vereen en egen Tiedschrift för sien Leden hebben sull. Neet blot dat. En plattdüütske Tiedschrift för heel Oostfreesland sull dat worden un en Soort Tiedschrift för neje Literatuur up Platt. Mit Johannes Diekhoff (Auerk), de do de Vörsitter van Oostfreeske Taal weer, Hans-Hermann Briese (Nörden) un Carl-Heinz Dirks (Emden) deen sük dree plattdüütske Schrievers tosamen un leten in September 1992 de eerste Utgaav van "DIESEL - dat oostfreeske Bladdje" in de Welt. Sietdeem keem DIESEL veer Maal in ‘t Jahr rut. Leden van Oostfreeske Taal kregen de Tiedschrift umsünst. Daarför bedeligte sük Oostfreeske Taal elke Jahr mit ruugweg 9.500 Euros an dat Rutgeven van dit Bladd. "DIESEL" is Enn 2018 to dat lest Maal rutgeven worden.